Sommar på Bø museum

Bø museum er ope frå laurdag 4. juli til sundag 2. august, tysdag til sundag, kl 12.00 – 17.00.
Program i løpet av sommaren:
Fredag 3. juli kl 18.00: Opning av sommarsesongen v/ordførar Siri Blickfeldt Dyrland. Orientering om årets utstillingar på Bø museum. Servering av kaffi og kake.
Sundag 05.07. kl. 15.00: Firfletting – handverk og kulturarv – nytt av gamalt, ved Torhild Aavik. Medlemer frå Midt-Telemark husflidslag er på museet med ymse handverk denne dagen.
Sundag 12.07. kl. 15.00: Tinga fortel. Finn Rønning og Marthe Haugerud gir oss historia bak gjenstandane.
Sundag 19.07. kl. 15.00: Plantevandring på Oterholt/Kvennøya med nyttevekstsakkyndig Iselin Coward.
Sundag 26.07. kl. 15.00: Eventyr, segn og soge. Familieprogram ved forteljar Astrid Holtskog.
Sundag 02.08. kl. 17.00: Spelemannen Torkjell Haugerud – eit hundreogfemtiårsminne, ved Torgeir Straand og Kari Lønnestad. I samarbeid med Folkemusikkarkivet i Telemark.
Vanleg museumsbillett på arrangementa. Kafe med kaffi, is, brus, vaflar.
Velkomen til Bø museum i sommar!

Energi på Kvennøya

Bø museum har denne veka gjennomført energidagar på Kvennøya for 6. klassetrinn ved Bø skule og 5. og 6. klasse Folkestad skule. Til saman har om lag 90 elevar vore på Kvennøya i løpet av fire dagar.
Elevane var innom ulike stasjonar: Oterholt kraftverk, minivasskraft, solceller, varmeenergi/bål, fossil energi (olje/bensin), energikamp (ulike konkurransar). Etter at elevane hadde vore på ein stasjon, måtte dei svare på eit spørsmålskjema. Elevane har fått kunnskap om ulike energiformer, interesserte og aktive elevar!
På bildet ser de Bjørn Steen som gir ei gruppe elevar innføring i solcellestraum.
Dette er tredje året Bø museum gjennomfører Energi på Kvennøya, som er eit tilbod gjennom den kulturelle skulesekken. Jarle Tyvold har laga undervisningsopplegget, og har vore prosjektleiar. Kvar dag har det i tillegg vore med 6 frivillige frå Bø museum.

Kulturtur i Folkestadgrenda
26. mai kl 17.30

Bø museum i samarbeid med Bø turlag inviterer til kulturhistorisk rusletur i øvre del av den kjende hardingfelegrenda. Me startar ved Lifjellkrysset/Telemark fjellbygg og vandrar ein rundtur på omlag 2,5 km etter vegar og stigar i øvre del av Folkestadgrenda. Her i området har det hendt mykje gjennom hundreåra og vore ei rivande utvikling, og det finst mykje lokal historie om liv og lagnad. Her har vore dans med kjende felespelarar, men òg triste hendingar.
Frammøte ved kommunehuset kl.17.30 for felles kjøring, eller ein kan møte opp ved Lifjellkrysset. Turen vil ta omlag 2 timar. Turleiar Gunleiv Brukås og andre lokalt kjende.

Pilegrimsvandring i Midt-Telemark måndag 25. mai

Den årlege pilegrimsvandringa i Midt-Telemark er i år 2. pinsedag, måndag 25. mai. Bø museum held ope mellom kl 12.30 og 16.00. Sal av kjøttsuppe. Om lag kl 13 kjem det nokre spelemenn frå Spelemannslaget Bøheringen. Velkomen skal du vere; om du går, syklar eller køyrer bil til Oterholt. Pilegrimsvandring 2026

Åsestugo i «husbunad»

Bø museum har hatt besøk av Torhild Aavik og Marthe Haugerud som arbeider med dokumentasjon av firfletting. Dei har kledd Åsestugo vakkert i «husbunad». Tjelda høgsete til bryllaup, sendingsklede, kisteklede og likkross. Silje Ensby frå Norsk håndverksinstitutt har filma det heile. Takk til alle for dokumentasjon og kunnskapsformidling av ein gløymt tradisjon.
Foto: Cecilie Authen, Bø museum.

Eventyr frå Midt-Telemark

Torsdag 16. april kl 19.00 – Pakkbua, Åheim.

Jutular, rusular, troll, gygrer og Oskefisar – dei fleste er med på denne forteljarkvelden på Bø museum. Det blir ein eventyrleg time med minst 150 år gamle historiar frå Midt-Telemark.
Høye Rue les og fortel, medan Olav H. Skjeldal syner illustrasjonane sine til eventyra.
Desse to står bak to eventyrbøker basert på materiale innsamla av Moltke Moe og Halvor H Nordbø på 1800-talet, og denne kvelden er det altså eventyr frå Midt-Telemark me får høyre. Det vil også bli høve til å kjøpe bøkene frå Tårån Forlag DA.
Enkel servering. Billett kr 150.

Nye artiklar frå Bø i digitalt museum

Ingebjørg Strand har skrive om korleis ho blei sikker på kven som hadde rosemåla kista ho arva etter mor si.

Tom Arnesen har skrive artiklar om
1. Vreim skule 
2. Jønneberg
3. Fattiggarden Harpestå
4. Kraftkaren på Torstveit

Telemark – skurk eller helt i kunsthistoria?

Torsdag 5. mars kl. 19.00 på USN, auditorium 1-115. NB: Merk at foredraget er på Universitetet, Gullbringvegen 36, Bø.
Foredrag ved forfattar og kunsthistorikar Tommy Sørbø om Telemarks plass i kunsten.
Kva er det med Telemark og kunsten? Ein gong dyrka av kunstnarane – seinare bruka som skjellsord av modernistane.
I dette foredraget tar forfattar og kunsthistorikar Tommy Sørbø oss med på ei danningsreise, frå nasjonalromantikkens svermeri for den dramatiske naturen og folkelivet i Telemark, via Erik Werenskiold, Halvdan Egedius og Torleiv Stadskleivs nyromantiske stemningsmåleri og fram til kunstnarane i mellomkrigstida, som dyrka Telemark som kjelde for den kunstnariske kreativiteten. Kunstnaren Henrik Sørensen samanlikna for eksempel telemarksstabburet med antikkens greske tempel.
Slik viser Sørbø oss korleis Telemark etter kvart blei ein av skurkane i kunsthistoria, som skulle bidra til å forklare kvifor norsk biletkunst etter kvart sakka akterut i kappløpet om å vera nyskapande.
Inngang kr. 200,-, studentar kr. 100,-. Velkomen!

Årsmøte Bø museum

Årsmøtet blir tysdag 24. mars kl 18.00 på Polen.
Årsmøtepapir 2026. Velkomen på årsmøtet!

Bø-kalenderen 2026

Bø-kalenderen 2026 er til sals bok Bø Bok og papir i Bø-gata og Norli på Bø-senteret.
Ønskjer du kalenderen tilsendt, så send ein epost til post@bomuseum.no.